Լիբանանի Մէջ Աղօթք Եւ Պատարագ` Սուրիոյ Խաղաղութեան Համար
Ընդառաջելով Ֆրանչիսկոս պապին կողմէ Սուրիոյ խաղաղութեան համար աղօթք մատուցելու կոչին`
շաբաթավերջին Լիբանանի մէջ քրիստոնեայ զանազան յարանուանութիւններու կողմէ մատուցուեցան
պատարագներ: Մարոնի համայնքի Պշարա Ռայի պատրիարքը շաբաթ երեկոյեան ժամը 6:00-ին,
Ս. Տիրամօր եկեղեցւոյ մէջ նախագահեց Սուրիոյ համար մատուցուած յատուկ պատարագին: Իր
քարոզին մէջ Ռայի պատրիարքը յայտնեց, որ Լիբանանի մէջ ապահովական կացութիւնը հետզհետէ
կը վատթարանայ երկրին մէջ զէնքի երեւոյթին տարածման, անձնական ապահովութեան դրութեան
ստեղծման եւ սահմանադրական հաստատութիւններուն մէջ յառաջացած երկփեղկումին պատճառով: Ռայի
պատրիարքը անդրադարձաւ նաեւ Լիբանան հասած սուրիացի գաղթականներուն եւ երկրին մէջ ստեղծուած
տնտեսական, ընկերային եւ ապահովական բարդ կացութեան: Ռայի պատրիարքը կոչ ուղղեց կազմելու
աշխուժ եւ կարող կառավարութիւն մը` ընդգծելով, որ լիբանանեան քաղաքական բոլոր կողմերը
ուրիշին նկատմամբ պէտք է դրական քայլի դիմեն` երկրին պետական եւ սահմանադրական հաստատութիւնները
ամէն բանէ վեր դասելով: Միւս կողմէ, Պքերքէի մէջ կիրակի օրուան պատարագին ընթացքին
Ռայի պատրիարքը պահանջեց մշակել ազգային պաշտպանութեան ռազմավարութիւն մը եւ վերջ տալ
անձնական ապահովութեան դրութեան: Ան ընդգծեց քաղաքական անձնաւորութիւններուն միջեւ
երկխօսութիւն կատարելու անհրաժեշտութիւնը եւ աւելցուց, որ երկրին կառավարութեան կազմութիւնը
ուշացնելով անոնք երկրին ճակատագիրին հետ խաղցած կ՛ըլլան: Սուրիոյ կատարած իր անդրադարձին
մէջ Ռայի պատրիարքը նշեց, որ վայրագութիւնն ու բռնարարքները կրնան միայն այլ բռնարարքներ
ստեղծել: Ան կոչ ուղղեց խաղաղութեան եւ երկխօսութեան: